مذكرات عبيد - الجزء 1

سيداتي آنساتي سادتي..

هييييه.. تذكرت حاجه

 تذكرت زمان اول لما كان المذيع يطش في الشاشه بهذي العباره...

زمان اول كان للتلفزيون طعم.. للبرامج طعم .. للمسلسلات العمانيه طعم..

وين (وتبقى الارض) ، (دروب) ،  (المال و البنون)*

*(المؤلف: المال و البنون مسلسل مصري بس ترا عبيد يخورها احيانا)

وين (بنك المعرفه) و (الشعر ديوان العرب)

انا بصراحه مادري ويش صار للدراما العمانية ، كلما حاولوا يطوروها رجعت ورا ، لو مخلينها على حالها كان احسن..

ولا التلفزيون.. مره مليت من كثير الدعايا في ام بي سي قلت اعرج على التلفزيون الملون ، حصلت صياد يرمي شبكة في البحر، وفي الشاشه مكتوب مسيرة الخير، بصراحه ما فهمت وشي دخل مسيرة الخير بالصياد..

بعد نص ساعه رجعت مره ثانيه و حصلت برنامج عن صناعة السعفيات

رجعت بعد ساعتين حصلت برنامج القلاع و الحصون...

قلت مثل ما يقول المثل العماني (الله يكفش يا لسان)

انا ما عجبني غير برنامج أثر التواجد العماني في زنجبار....

هييه و ين زنجبار اليوم و هين كانت أمس،  وين كانت عمان اول لما كانت امبراطورية

بس سمعت انه عام 2020 ستكون عمان امبراطورية.. ما بس كذا، سمعت انه عام 2020 ستحدث اشياء كثيره.

نرجع لموضوعنا..

سيداتي آنساتي سادتي...

محدثكم عبيد .. سيحكي لكم جزء من مذكراته..

اكيد تتساؤلوا,, ليش  جزء و ما كل المذكرات..

لانه ما يصير احكي كل مذكراتي,فيها اشياء خاصه

 يا اخوان و اخوات احنا جزء من مجتمع شرقي.. مجتمع محافظ

ولا عاجنكم الي صار في الحلقه الاخيره من برنامج (هو و هي).

لما البنت تتصل بأمها  و تسألها متى .... قالت الام من يومين..!

يعني صح المجتمع ما صار محافظ مثل الاول،

يسدك تروح كارفور و تشوف الغرايب. الاب يمشي قدام و جنبه الام و وراه البنات, العباية مخصره اذا شي عباية اصلا,

و البودره مكيال و الكحل مثقال، و المفاتن اثقال اثقال..

مره زوجتي هاوشتني في كارفور، قالت اشوف على البنات و الحريم..

بس انا من وين اقدر اشوف و نظري ضعيف اصلا.

وبعدين لو كان نظري قوي. ليش ما اشوف,, هذي الفطره في الرجال

لو ما كانت فطره ما كان الدين امرنا نغض البصر!

قالت اذيت بنات الناس ما قدرن يتحركن ،

انا اذيتهن,, بالعكس.. انا اديت الي علي

يعني الي تخصر العباه على جسمها و مطلعه مفرق الشعر و تتمايل يمين و يسار،

ويش قصدها، ما قصدها (انا جايه شوفوني)

والعتب على الشباب بعد ، وين النخوه لما الشاب يريد يضحك و يكذب على بنت بلده ، الي المفروض تعتبر اخته في الوطن..

عموما خلونا نرجع لمحور حديثنا.. راح اسرد جزء من مذكراتي

اكيد تقولوا و الي قلته قبل ويش ، ما مذكراتك ؟!!...

لا. هذيك المقدمة.. انتوا ما سمعتوا انه ابن خلدون ألف كتاب كامل اسمه مقدمة ابن خلدون ؟

(يتبع...)