دعوني اسرد لكم مذكراتي..
ذات يوم (احيانا احب اكتب بالفصحى),, كنت جالس اشوف مباراة السامبا.. سامبا الخليج (زمن اول)..
والله ما دري اذا بعده سامبا الخليج و لا خلاص ودع ،
المشكله المنتخب متقلب ، مره يلعب و متجانس و مقاتل
ومره تشوفه يلعب تتذكر زمانك لما كنت تلعب في التله ،
تذكرت نكته تقول ، 3 اشياء ترفع الضغط ، 1. ... و 2.... و 3. المنتخب.
انا من زمان حلفت ما اشوف مباراة للمنتخب ، اسمع النتيجه لما تخلص المباراه ،
عموما
المباراه كانت مع فريق انجلترا.. فوزي بشير قريب الجوول ، اما عليه تمريرات (زمن اول).. إلا شوي و تنقطع الكهرباء..(مثل زمن اول)
"لا حول و لا قوة إلا بالله" صرخ محدثكم..
إلا و تجي زوجتى من المطبخ تركض,:
"خير. من مات، حد سوا حادث؟" ترا معروف ، ما شي مأساه في عمان إلا وراها حادث.
" لا .. ما تشوفي الكهربا منقطعه"
"اشوف بس مالك محتشر. ما اول مره تنقطع" .
هي صحيح.. ما اول مره..
بعدني اتذكر لما انهار (مشعل) ولد جارنا (ابو مشعل)، هي السالفه فيها قصه، ليش سما ولده مشعل، كان ابو مشعل يشتغل في البحرين ايام الستينات و لما سافر في المركب كانت زوجته حامل ، وصاها ما تسميه غير بشوره، رسلوله رساله انه جاه ولد ، طبعا الرساله تاخذ شهرين لين توصل، و شهرين غير لحد ما رد ابو مشعل وقال سموه مشعل.
ابو مشعل دايما يحكي كيف تعذب في البحرين,اشتغل بناء ،و كانوا يعيشوا 6 عمانيين في غرفه وحده ، كانوا ياكلوا وجبه وحده في اليوم عباره عن سمك معلب ..
قلتله يا بو مشعل : تتوقع يرجعوا العمانيين يشتغلوا مره ثانيه في الخليج ؟
قال الحين شي عمانيين يشتغلوا ، بس يشتغلوا بشهاداتهم و خبرتهم.
انا استغربت ، ليش بس العمانيين في الخليج هم الي يشتغل خارج بلده!!
عموما كنا نتكلم عن مشعل لما جاه انهيار عصبي لان الكهربا انقطعت المغرب ايام متحان الثانويه و كان عنده امتحان اليوم الثاني الصبح.. بس في النهايه نجح بتفوق و دخل الجامعه ، و عيونه معيد و راح يدرس في الخارج.
No comments:
Post a Comment